LÍS fagna tillögu þingmanna Samfylkingarinnar um rétt stúdenta til atvinnuleysisbóta
Landssamtök íslenskra stúdenta (LÍS) fagna tillögu númer fjögur í þingsályktunartillögu sem lýtur að því að stúdentum verði tryggður réttur til atvinnuleysisbóta frá 1. júní til 31. ágúst 2020. Tvö aðildarfélög LÍS hafa kannað stöðu stúdenta með tilliti til sumarstarfa og fjárhagsöryggis, bæði Stúdentaráð Háskóla Íslands (SHÍ) og Nemendaráð Listaháskóla Íslands (NLHÍ). Samkvæmt könnun SHÍ vegna sumarstarfa og fjárhags, sem var birt 12. apríl 2020, höfðu 40% svarenda ekki enn fengið sumarvinnu. Frá því að könnun SHÍ var birt hefur staða vinnumarkaðsins farið versnandi og þúsundir misst störf sín síðastliðna daga. Þann 29. apríl birti NLHÍ niðurstöður sinnar könnunar um sumarstörf og fjárhag stúdenta. Samkvæmt henni eru 65,8% nemenda LHÍ óörugg með vinnu í sumar. Háskólinn í Reykjavík gerði sambærilega könnun á meðal sinna nemenda sem var birt 21. apríl. Samkvæmt henni er helmingur nemenda ekki kominn með vinnu fyrir sumarið.
Nú eru rúmar tvær vikur liðnar síðan ríkisstjórnin kynnti seinni aðgerðarpakkann sinn sem innihélt aðgerðir handa námsmönnum. Aðgerðirnar beinast einna helst að sköpun sumarstarfa og sumarnámi og er þessa stundina unnið að útfærslum þeirra. Þegar aðgerðarpakkinn var kynntur var gert ráð fyrir um 3.000 störfum. Ef litið er til niðurstaðna fyrrnefndra kannanna verður fljótt ljóst að 3.000 sumarstörf munu aðeins nýtast takmörkuðum hluta stúdenta þar sem kannanirnar benda til að um 5.200 stúdentar frá Háskóla Íslands, 243 stúdentar frá Listháskóla Íslands og 1.700 frá Háskólanum í Reykjavík séu ekki komnir með sumarstarf.
Tækifæri stúdenta til að afla sér tekna í sumar eru mun takmarkaðri en áður og af þeim sökum er nauðsynlegt að björgunarúrræði atvinnuleysisbóta geti gripið þá eins og önnur ef fýkur í flest skjól. Nám er vinna og ætti að vera metin sem slík, þegar stúdentar eru án náms og vinnu eru þeir atvinnulausir, rétt eins og aðrir þjóðfélagsþegnar. Í þessu samhengi vísa LÍS til ályktunar sinnar um rýmri rétt stúdenta til atvinnuleysisbóta sem samstarfsnefnd háskólastigsins, sem samanstendur af öllum rektorum háskóla á Íslandi, studdi.
Veigamesta aðgerð ríkisstjórnarinnar þarf að vera að veita stúdentum rétt til atvinnuleysisbóta svo stúdentar hafi björgunarhring sem getur fleytt þeim í gegnum komandi öldurót.
Lesa má nánar umsögn LÍS um þingsályktunartillögu um aðgerðir í þágu atvinnulausra vegna COVID-19-heimsfaraldursins hér að neðan: