LÍS rannsakar áhrif nýja námslánakerfisins í samstarfi við BHM
Gunnar Alexander Ólafsson, formaður Lífeyris- og lánanefndar BHM, og Lísa Margrét Gunnarsdóttir, forseti LÍS
Lífeyris- og lánanefnd BHM og Landssamtök íslenskra stúdenta hafa gert með sér verksamning um samstarf við greiningu á áhrifum lagabreytinga sem tóku gildi árið 2020 með lögum um Menntasjóð námsmanna.
Markmið verkefnisins er að aflta traustra gagna og nákvæmari upplýsinga um stöðu og kjör námsmanna, auk þess að leggja mat á áhrif nýja námslánakerfisins á fjárhagsstöðu, námsframvindu og aðgengi stúdenta að vinnumarkaði.
Greiningin mun meðal annars fjalla um:
áhrif 30% niðurfellingar út frá félagslegum og efnahagslegum aðstæðum,
áhrif kynbundins launamunar, fjölskylduábyrgðar og brotakennds starfsferils á endurgreiðslu námslána,
stöðu þeirra sem ekki teljast lánshæfir eða uppfylla skilyrði fyrir undanþágum,
og samanburð við stöðu og réttindi stúdenta á Norðurlöndum og í Evrópu.
Ráðinn verður sérfræðingur til að vinna hagfræðilega greiningu og skýrslu um niðurstöðurnar. Verkefnið verður unnið í nánu samstarfi við BHM og LÍS og byggir á fyrirliggjandi gögnum, meðal annars frá Menntasjóði námsmanna, Hagstofu Íslands, skattyfirvöldum og sameiginlegum könnunum BHM og LÍS á lífskjörum stúdenta. Niðurstöður verða kynntar á opnum fundi á vegum BHM og LÍS vorið 2026.
