Hádegisfundur BHM og LÍS - Ungt fólk á bið: Námslán, húsnæði og leiðin til sjálfstæðis

Hversu greið er leið ungs háskólafólks frá námi til fjárhagslegs sjálfstæðis? BHM og Landssamtök íslenskra stúdenta standa fyrir hádegisfundi í Norræna húsinu 10. nóvember kl. 11:30 - 13:30 þar sem sjónum verður beint að samspili námslána, vinnu með námi, húsnæðisstöðu og sjálfstæðrar búsetu.

Fundurinn er framhald af umfangsmikilli könnun Félagsvísindastofnunar Háskóla Íslands á stöðu háskólamenntaðs fólks á húsnæðismarkaði. Að henni standa aðildarfélög BHM ásamt Félagi íslenskra hjúkrunarfræðinga, Lyfjafræðingafélagi Íslands, Læknafélagi Íslands og Verkfræðingafélagi Íslands.

Nú verður sjónum sérstaklega beint að ungu fólkinu á aldrinum 18-34 ára og leið þess frá námi til sjálfstæðis. Fjallað verður um veikleika námslánakerfisins, flókna stöðu fyrstu kaupenda á fasteignamarkaði og þær fjárhagslegu hindranir sem gera ungu fólki erfitt fyrir að koma sér upp eigin heimili.

Taktu þátt í mikilvægu samtali um námslán, húsnæði og leið ungs fólks til sjálfstæðis. Smelltu hér til að skrá þig á fundinn.

STÚDENT ÓSKAST! STUDENT NEEDED!

Landssamtök íslenskra stúdenta (LÍS) og Gæðamat háskóla auglýsa eftir háskólanema til að taka þátt í stofnunarúttekt Listaháskóla Íslands. Staðan er launuð. 

Skilyrði: 

• Að vera háskólanemi eða að hafa útskrifast fyrir ári eða minna.

• Að hafa stundað nám við íslenskan háskóla. 

• Reynsla af þátttöku sem fulltrúi nemenda í gæðastarfi, nefndum eða ráðum innan háskóla er æskileg.

• Góð munnleg og skrifleg enskukunnátta.

• Má ekki hafa tengsl við eða stundað nám við Listaháskóla Íslands.

Nánari upplýsingar:

• Launuð staða.

• Úttektin fer fram í Reykjavík 15. - 19. mars 2027 (viðveru krafist alla dagana).

• 3 undirbúningsfundir á netinu, 4. des 2026, 27. jan 2027 og 26. feb 2027, kl. 10-13 (þátttöku krafist á öllum fundum).

• Nemandi tekur fullan þátt í úttektarnefndinni til jafns við aðra nefndarmeðlimi.

• Umsóknarfrestur er til og með 23. október. 

  Eftirfarandi gögn þurfa að fylgja umsókn:

  CV á ensku 
  Kynningarbréf á ensku þar sem viðeigandi reynsla er útlistuð ásamt áhuga á því að taka þátt í úttektarnefndinni. 
  Nafn netfang og símanúmer. 
  Háskóli og nám. 
  Með umsókn samþykkir umsækjandi að LÍS megi deila CV, kynningarbréfi og tengiliðaupplýsingum með Gæðamati háskóla.  

  English:

  The National Union of Icelandic Students and the Icelandic Agency for Quality Assurance (IAQA) are seeking a student to join a review panel for the institution-wide review of Iceland University of the Arts. This is a paid position.

  Requirements: 

  • To be a current student or no more than one year since graduation.

  • To have studied at an Icelandic university. Experience of participation in internal quality assurance, or committee/council work as a student representative is an advantage.

  • Fluency in written and spoken English.

  • No close connection nor experience with the university under review.

  Applications are open until 23 October. Send yours to lis@studentar.is 

  More information:

  • This is a paid position.

  • The review will take place in Reykjavik 15-29 March 2027 (attendance required all days).

  • 3 online preparatory meetings: 4 December 2026, 27 January 2027, 26 February 2027 at 10:00-13:00 (participation required in all meetings).

  • The student participates fully in the panel equally with other panel members.

  • More information on institution-wide review may be found on IAQA’s website.

  The following information shall be submitted with the application: 

• CV in English 

• Application letter stating relevant experience and interest in the project. 

• E-mail and phone number. 

• Current studies and university. 

• By applying you consent that LÍS can share the CV, application letter and contact information with IAQA.

Samtal í Háskóla Íslands

Landssamtök íslenskra stúdenta (LÍS) og Stúdentaráð Háskóla Íslands (SHÍ) stóðu í dag fyrir Samtali þjóðar í Háskóla Íslands þar sem stúdentar komu saman til að ræða framtíð samfélagsins og velta fyrir sér spurningunni: Hvernig samfélag viljum við skapa saman?

Samtalið í Háskóla Íslands var það fjölmennasta sem haldið var á vegum verkefnisins og jafnframt eina samtalið sem fór fram á ensku auk íslensku. Með því vildi stúdentahreyfingin tryggja að alþjóðanemar og innflytjendur gætu einnig tekið virkan þátt í umræðunni og lagt sitt af mörkum til að móta framtíð íslensks samfélags.

Samtal þjóðar er verkefni sem varð til að frumkvæði Höllu Tómasdóttur, forseta Íslands, og byggir á þeirri hugmynd að samfélagið verði sterkara þegar við gefum okkur tíma til að hlusta hvert á annað, ræða saman og taka virkan þátt í að móta framtíðina.

Með þátttöku sinni lagði stúdentahreyfingin áherslu á mikilvægi þess að raddir ungs fólks og stúdenta, óháð uppruna og tungumáli, fái að heyrast í samtalinu um framtíð Íslands.

Skoðaðu samantektir úr Samtali frá yfir 20 stöðum um allt land á heimasíðunni talasaman.is.

Ný skýrsla LÍS og BHM um áhrif og afleiðingar Menntasjóðs námsmanna

Ný greining varpar ljósi á veikleika námslánakerfisins: Markmið 2020-breytinga ekki að skila sér

Landssamtök íslenskra stúdenta og BHM efndu til hádegisfundar þar sem kynntar voru niðurstöður nýrrar greiningar á íslenska námslánakerfinu. Greiningin fjallar um afleiðingar nýs námslánakerfis, sem var kynnt sem veruleg kjarabót fyrir stúdenta, en margfalt hærri vextir og skortur á sveigjanleika í kerfinu hafa gert íslensk námslán verri fyrir stúdenta.

Nanna Hermannsdóttir, hagfræðingur, lánasjóðsfulltrúi SÍNE og höfundur greiningarinnar.

Niðurstöður greiningarinnar eru meðal annars að núverandi námslánakerfi grafi undan markmiðum atvinnustefnu Íslands og eigin lögbundna hlutverki sem „félagslegur jöfnunarsjóður“.

Greiningin fer fram á mikilvægum tímamótum, en fyrstu lántakar nýja kerfisins hafa nú hafið endurgreiðslur og lögbundin heildarendurskoðun laganna er framundan.

Nanna Hermannsdóttir hagfræðingur kynnti helstu niðurstöður greiningarinnar á fundinum og Logi Einarsson, menningar-, nýsköpunar- og háskólaráðherra, var sérstakur gestur og tók þátt í umræðum.

Í greiningunni er meðal annars fjallað um:

• Hver markmið nýs námslánakerfis voru og hvers vegna þau náðust ekki

• Áhrif hærri vaxta og breyttra skilyrða á stöðu námsmanna

• Samanburð við námslánakerfi á Norðurlöndum

Með skýrslunni er ætlað að stuðla að upplýstri umræðu um framtíð námsstuðnings á Íslandi.

Árangur eða afturför? Hádegisfundur um nýja greiningu LÍS og BHM þann 7. maí

Landssamtök íslenskra stúdenta og BHM boða til hádegisfundar um íslenskt námslánakerfi og námsstuðning Menntasjóðs námsmanna.

Á fundinum verða kynntar niðurstöður nýrrar rannsóknar á námslánakerfinu og áhrif breytinganna sem gerðar voru á kerfinu árið 2020.

Nanna Hermannsdóttir, hagfræðingur og höfundur greiningarinnar, kynnir niðurstöðurnar.
Gestur fundarins verður Logi Einarsson, menningar-, nýsköpunar- og háskólaráðherra.

Árið 2020 tók Menntasjóður námsmanna (MSNM) við af Lánasjóði íslenskra námsmanna (LÍN) og var meginmarkmið hins nýja námslánakerfis að tryggja hagsmuni námsmanna á Íslandi betur en áður hafði verið gert. Kerfið átti að verða mikil kjarabót fyrir stúdenta þar sem boðið var upp á 30% námsstyrk. Minna var fjallað um að á móti komu margfalt hærri vextir og sveigjanleiki í námi var takmarkaður.

Nú hafa fyrstu greiðendur hafið endurgreiðslur lána sinna og lögbundin heildarendurskoðun laganna er á dagskrá í ráðuneytinu. Af því tilefni ákváðu Lífeyris- og lánanefnd BHM og Landssamtök íslenskra stúdenta (LÍS) að ráðast í greiningu á áhrifum nýja námslánakerfisins og var Nanna Hermannsdóttir hagfræðingur fengin til verksins.

Á fundinum verður kynnt greining á afleiðingum þeirra breytinga sem fólust í lögum um Menntasjóð námsmanna frá árinu 2020. Í greiningunni er meðal annars fjallað um hvers vegna markmið laganna, svo sem styttri námstími, jafnari stuðningur og minni atvinnuþátttaka meðfram námi, hafa ekki gengið eftir auk þess sem ljósi verður varpað á hvernig ákveðnar breytingar vinna beinlínis gegn markmiðum sjóðsins sem félagslegs jöfnunarsjóðs. Þá verður sérstaklega farið yfir breytingu á eðli og umfangi námsstuðnings hins opinbera í samanburði við eldra kerfi auk samanburðar við námslánakerfi hinna Norðurlandanna.

Fundurinn verður haldinn í fundarsal Visku í Borgartúni 27, 3. hæð, kl. 12:00 - 13:30 þann 7. maí.