Krefjast samráðs og að hagsmunir nemenda HR séu tryggðir við framkvæmdir Borgarlínu
Fulltrúar Landssamtaka íslenskra stúdenta, LÍS, og Stúdentafélags Háskólans í Reykjavík (SFHR) afhentu í dag Heiðu Björg, borgarstjóra Reykjavíkur, formlega yfirlýsingu þar sem lýst er yfir verulegum áhyggjum af áhrifum framkvæmda við Borgarlínu á nemendur Háskólans í Reykjavík. Yfirlýsingin, sem var samþykkt samhljóða á landsþingi LÍS á Akureyri þann 11. apríl síðastliðinn, krefst þess að beðið verði með óafturkræfar aðgerðir á svæðinu þar til raunverulegt samráð hefur átt sér stað við stúdenta.
Í yfirlýsingunni er lögð rík áhersla á að þótt stúdentar geti ekki stöðvað breytingarnar, verði Reykjavíkurborg, Betri samgöngur og HR að setja hagsmuni nemenda í forgang. Skortur á upplýsingagjöf og óljósar áætlanir um mótvægisaðgerðir eru gagnrýndar harðlega.
Helstu áhyggjuefni og kröfur stúdenta sem koma fram í yfirlýsingunni:
Skortur á samráði og upplýsingum: Enn hefur ekki verið gerð grein fyrir því hvernig koma eigi til móts við nemendur á framkvæmdatíma. Rætt hefur verið um samstarf við Strætó og tímabundin bílastæði, en engar skýrar áætlanir liggja enn fyrir.
Aðgengi og fækkun bílastæða: Fyrir liggur að stæðum við skólann mun fækka um 23% þegar mörg hundruð stæði, þar á meðal malarplanið, munu hverfa. Ljóst er að þetta mun raska daglegu skipulagi og aðkomu stórs hluta nemenda.
Harðlega lagst gegn gjaldtöku á bílastæðum: SFHR ítrekar eindregna andstöðu sína við áform um gjaldtöku á þeim bílastæðum sem eftir verða á landi Háskólans í Reykjavík. Stúdentar telja óverjandi að nemendur þurfi að bera aukinn fjárhagslegan kostnað ofan á skert aðgengi.
Svikin loforð um þungaflutninga á háannatíma: Þrátt fyrir fyrirheit ábyrgðaraðila um að þungaflutningar fari ekki fram þegar umferð nemenda er hvað mest, hafa fjölmargar athugasemdir borist um þungaflutninga milli klukkan 8:00 og 9:00 á morgnana. Slíkt er með öllu óásættanlegt.
Áhrif á námsumhverfið: Framkvæmdirnar mega undir engum kringumstæðum skerða aðstöðu eða aðgengi að stoðþjónustu vegna hljóð- eða sjónmengunar.
„SFHR og LÍS munu beita sér af fullum þunga fyrir því að hagsmunir nemenda verði virtir og varðir,“ segir í lok yfirlýsingarinnar. Þess er krafist að nemendur, sem einir helstu hagaðilar skólans, eigi framvegis ávallt sæti við borðið við ákvarðanatöku í þessu umfangsmikla máli.
Lesa má yfirlýsinguna í heild hér: „Yfirlýsing varðandi áhrif framkvæmda tegndum Borgarlínunni á nemendur við Háskólann í Reykjavík“